Los anovadores productos del Llagar Panizales namoraron a los asistentes a la tastia guiada entamada pol Clú de LA SIDRA, cola colaboración cola Escuela d’Hostelería de Xixón
LA SIDRA.- La cita, na tardi d’ayeri xueves na Escuela d’Hostelería de Xixón, aconceyó a una docena presones –dexando a otres munches ensin plaza, por mor de les restriciones d’aforu impuestes pol andanciu- que tuvieron el lluxu ya’l placer d’esfrutar tanto de los esceicionales productos de Sidra Panizales comu de les desplicaciones de Faustino Vazquez, el so llagareru.
Entamando por una sidre tradicional, pero al mesmu tiempu especial, la tastia abrióse con Ánima, una sidre con dos años d’espera qu’algamó unes carauterístiques organoléptiques mui llimpies y equilibraes.
En fase olfativa remembra bastante a les sidres “d’anantes”con balsámicos bastante evolucionaos, tipo manzaniella o tomíu y toques cítricos a llimón mauro. Destaca lo llimpio del so tastu y la so persistencia en boca.
Darréu foi el turnu de tastiar Viesk, un vermú de sidre qu’evoca a la sidre de xelu, pero con más gradación (15%) con un toque más golosu y especiáu, ensin llegar nunca a repunar gracies a los sos ácedos, na que ye fácil reconocer tantu l’arume comu’l tastu de la mazana y de la sidre’l duernu. El so únicu defeutu: entra tan bien que ye difícil aparar de bébelo.
Nun podía faltar nesta tastia la Sidre de Xelu Panizales, la primera d’esti tipu que se fexo n’Asturies y que continúa estremándose del restu pol equilibriu que presenta pente dolces y ácedos, toos ellos algamaos naturalmente de magar la sidre’l duernu xelao y desidratao nun llargu procesu que garantiza el so toque tan particular.
Y si falamos de sidre con presonalidá, Olivia ye un productu únicu, ñacía del prodixosu maxín d’esti alquimista, que meció nesti casu los procesos de la sidre de xelu y de la sidre de fuéu, formientando xuntes les dos y algamando un productu intensu, reondu y equilibráu nel que puen estremase les carauterístiques d’ambes.
Finalmente, la sospresa aportó col caberu “esperimentu” de Faustino, un vinagre de sidre de tal tastu que munchos de los presentes nun se conformaron con valorar les sos carauterístiques con un sorbín, sinón que bebieron del vinagre col mesmu gustu que si fore un pigazu de llicor, pa ser quien a estremar tolos sos matices.
En resume, una tastia perinteresante y completa na que los presentes pudieron conocer nuevos productos y afondar nel conocimientu de los non tan nuevos.
