Un auténticu lluxazu, esta caldereta de pexe y mariscu, qu’esfrutamos nuna de les sidreríes más mítiques del barriu más mariñán de Xixón, El Lavaderu, de Cimavilla.
La terraza taba enllena y con xente esperando mesa, col bon ambiente que se respira d’avezu nesa plaza, pero nós teníemos mesa reservao y una caldereta mariñana esperándomos, asina qu’entremos darréu pal comedor.
Non en baldre la caldereta de pexe y mariscu ye ún de los platos estrella de la casa.
Nun hai dubia de que na cocina d’El Lavaderu saben sacar el meyor tastu al Cantábricu con una combinación de fañeca, chopa, llubina, bugre, gambón y amasueles, que sedría pecáu acompangar con daqué que nun seya sidre, nesti casu del Llagar Menéndez.
Hai que tener en cuenta que la composición de la caldereta ye siempres variable, en función de la disponibilidá del pexe y del mariscu na temporada, yá que nun trabayen más que con materiales frescos y de cercanía.
Sidrería El Lavaderu. Pza Periodista Arturo Arias. Cimavilla. Xixón T. 984 98 40 16
