Semeya: José Luis y Juan Manuel Díaz, hosteleros de ‘La Consistorial’, al fondu David Fernández-Prada de Gustatio, el chef Pedro Morán, l’alcalde de Villaviciosa Alejandro Vega y el presidente de Otea José Luis Álvarez Almeida
L’establecimientu mierense alzóse col títulu na final cellebrada ayeri en Villaviciosa
LA SIDRA.- Nesti 2021 la meyor fabada cómese en ‘La Consistorial’, en Mieres. Un premiu que sirvió d’aliciente al restorán pa siguir col so bon llabor, yá que nesti andanciu foi duramente cutíu pol coronavirus. Llamentablemente la madre de los propietarios finó pola Covid, y amás, esta malura, afeutó a dellos de el trabayadores. Con tou, supieron lluchar pol so oficiu, bien reconocíu tanto na so llocalidá, como en toa Asturies. ¿Quién nun sintió falar de los callos o la fabada de ‘La Consistorial’? La fama preciéde-yos.
Clasificada en segundu llugar quedó Casa Hortensia de Madrid y el tercer puestu foi pa El Cenador de los Canónigos de Cangues d’Onís. Per otru llau, el premiu al ‘Meyor Compangu del Mundu’, patrocináu por Embutíos Naveda, foi pal Mesón Sidrería Arturo de Madrid y la meyor fabada llocal, el Memorial Amable Bedriñana’, llevólu Casa Eladia. Dende l’añu pasáu esiste tamién una categoría de ‘Meyor Fabada de Menú’, que recayó en Tabierna Tapería La Botica de Llastres, siguíu de Sidrería Prida de Nava y El Merenderu de Cuadonga.
La undécima edición del concursu, entamáu pol Conceyu de Villaviciosa y la empresa d’eventos gastronómicos Gustatio, axuntó na final a 25 establecimientos, partíos per tola xeografía española. Los trés primeros clasificaos llevaron amás del so correspondiente troféu un magnum del vinu de Cangas Corias Guilfa y otru de la sidra brut Pomarina, dos productos con ADN asturianu protagonistes nel eventu. El ganador, enfundó’l chaquetu conmemorativu y presonalizáu de la firma Monza donada por Llaboral San Antonio.
El xuráu encargáu d’escoyer “La Meyor Fabada del Mundiu” ta conformáu polos cocineros Pedro Morán de Casa Gerardo, Luis Alberto Martínez de Casa Fermín, Isaac Loya del Real Balneariu, Gregorio García de Oleum y Joaquina Rodríguez de Casa Chema; xunto colos espertos gastronómicos Juan Antonio Duyos, David Fernández-Prada y Víctor Berdasco, de Tierrina Vaqueira.
