Na presentación de la nueva collecha de sidre sobro la madre, el llagar xixonés distinguió como “Madres de la Sidre” a siete muyeres referenciales pola so vinculación col mundiu la sidre
LA SIDRA.- Esti eventu, que recueye dende va trés años la reconocencia a les muyeres dientru’l mundiu la sidre, desendolcóse de forma presencial con aforu llindáu, siguiendo toles midíes restrictives derivaes del COVID-19, lo mesmo que de forma virtual al traviés de redes sociales.
Tres la presentación llevada a cabu pola periodista Cecilia Iglesias, siguida por Samuel Trabanco y la so fía Yolanda, procedióse a la entrega de premios a les siete “madres de la sidre” escoyíes esti añu.
Nesta ocasión, les premiaes fueron Maria Dolores Martínez, de Sidrería Casa Ferino; Belén Esteo, de Sidrería Montera Casa Güela; Mar González, de Sidrería Rompeolas; Adelina Fernández y la so fía Maria José Poladura; pumareres Loli García, de Sidrería Bedriñana y Araceli Estrada, madre de la sidre honorífico, primer muyer al volante d’una ambulancia n’Asturies.
Les siete muyeres premiaes amosáronse encantaes y sosprendíes por esta reconocencia inesperada que, en cualisquier casu ye merecíu pola so llarga trayeutoria rellacionada col mundiu sidreru.
Yolanda Trabanco, pela so parte, confesó tar illusionada pola posibilidá de premiar el trabayu de toles muyeres que, ensin ser reconocíes, suponen un pegollu fundamental pa sofitar el mundiu la sidre.
Tres la ceremonia d’entrega de premios procedióse a la degustación de la Sidre Sobro la Madre, acompangada de diversos platos ufiertaos pol restorán Trabanco.
