Semeya: imaxe d’una edición pasada de la PSLA nel Muséu del Pueblu d’Asturies, esti añu les actividaes van ser distintes pa cumplir coles midíes sanitaries.
Cellebraráse del 1 al 4 d’abril de manera presencial y telemática, cumpliendo siempres coles restriciones pol andanciu
LA SIDRA.- Torna la Primer Sidre L’Añu –PSLA– anque con restricciones por mor del andanciu. La Fundación Asturies XXI, la so organizadora, planió estremaes actividaes telemátiques y presenciales pa la so cellebración.
Presenciales:
- Xueves 1 d’abril 12:30 hores. Naguración oficial delantre del llagar del Muséu del Pueblu d’Asturies. va apurrise’l premiu a la ‘Meyor Primer Sidre L’Añu’, concursu que se llevó a cabu’l pasáu 25 de marzu. Nesta edición la ganadora foi SidraHuerces. Al actu van asistir, ente otros, el presidente de la Fundación Asturies XXI, Marcos Fernández; y el xerente del citáu llagar, José Antonio Norniella. La echaora que va echar el primer culín va ser Alejandra Venegas, de la sidrería La Montera Picona de Ramón.
- Vienres 2 d’abril de 12:00 a 20:00 hores. Sidracrucis. Va ser distintu al d’otros años poles restricciones. Los participantes van poder dir en grupos de non más de cuatro persones a siete sidreríes que van cuntar cola ganadora Sidra Huerces. Los establecimientos son: Sidrería Tírate al Matu, Sidrería Marisquería Poniente, Sidrería Jaime, Sidrería El Nuevo Parque, La Montera Picona de Ramón, Sidrería El Centenario y Sidrería El Veleru. La iscripción de 5 euros inclúi: mázcaru del Sidracrucis, una botella de sidre Huerces, mapa de Xixón colos chigres, etiqueta comemorativa y un carné del Sidracrucis.
- Sábadu 3 d’abril a les 16:30 hores. va realizase una Tastia Guiada nel llagar del restorán El Duque. Esta va consistir nuna degustación de les cinco primeres sidres clasificaes nel Concursu ‘La Meyor Primer Sidre L’Añu’: Sidra Huerces –la vencedora–, y tamién Viuda de Angelón, Sidra Riestra, Sidra M. Vigón y la DOP Ramos del Valle. Tamién se catará la sidra del propiu llagar El Duque ya Isidra, d’El Piloñu, una sidra natural ensin alcol. La tastia va ser impartía pol llagarero y enólogu José Antonio Norniella (de Sidra Huerces) y tamién polos especialistes Manuel G. Busto y Joaquín Fernández. Una vegada más va ser Venegas quien eche los culinos y tamién se va cuntar con echaores llétricos, atendiendo al fechu de que la tastia podrá vese de forma telemática y que dellos de los siguidores puen tener un d’estos aparatos en casa. El númberu places va ser llindáu y tola tastia va rializase cumpliendo lo axustao poles autoridaes sanitaries.
- Domingu 4 d’abril a les 12:30 hores. Escomenzará’l ‘IX Concursu de Sidre Casero fecho en Maera’. Un certame pa los ellaboradores non profesionales de toa Asturies y nel que se recupera la tradición de faer sidre en pipes de maera. La entrega de premios ta prevista a les 14:30 hores, aprosimao.
Tocántenes a les actividaes telemátiques:
- Una d’elles va ser la de ‘Asturianada y Sidre’. va abrise una llista de reproducción específica en Youtube con interpretaciones de cantares asturianos rellacionaos cola sidre. Tamién se va emitir al traviés de les redes sociales.
- Ello ye que del 1 al 4 d’abril va realizase una importante llabor d’espardimientu en diches redes de toles actividaes de la PSLA en Facebook (https://www.facebook.com/lasidrainfo); Youtube (https://www.youtube.com/user/INFOLASIDRA), ya igualmente en Instagram y Twitter (@revistalasidra) utilizando’l hashtag #PrimerSidreLAñu
PRIMER SIDRE L’AÑU / MEYOR PRIMER SIDRE L’AÑU / SIDRACRUCIS / TASTIA GUIADA / IX CONCURSU DE SIDRE CASERO FECHO EN MAERA
(Visited 2.895.985 times)
