Esti xueves 25 de marzu llevaráse a cabu la VIII edición del certame, fasta’l momentu inscribiéronse 38 llagares d’Asturies
LA SIDRA.- Güei xueves 25 de marzu cellebraráse’l Concursu La Meyor Primer Sidre L’Añu. Va ser na sidrería La Montera Picona de Ramón de Xixón. La preseleición de les sidres va escomenzar a les 12:00 hores. Nesta escoyeránse les que van pasar a la final. Darréu, a les 18:30 hores, va dar entamu la tastia final de les sidres escoyíes pa, una vegada que se sumaren les puntuaciones, dar el veredictu final. Envalórase que dichu veredictu fadráse públicu ente les 19:30 y 20:00 hores, dependiendo de si hai empates o non.
El xuráu va tar presidíu por Manuel G. Busto y constituyíu por Armando Lloreo, Manuel Castro, Ana María Viciosa, Joaquín Fernández y Jesús Paesa. La degustación va ser a ciegues y en ca ronda camudará l’orde de les sidres participantes. Pal serviciu d’echáu cuntaráse con Alejandra Venegas, echaora de La Montera Picona de Ramón, participante davezu nel Campionatu Oficial d’Echaores d’Asturies.
La sidre premiao va ser la oficial de la XI edición de la Primer Sidre L’Añu, qu’esti añu cellebraráse de forma telemática y presencial, pa cumplir con tolos encamientos sanitarios. La PSLA va cellebráse del 1 al 4 d’abril. El 1 d’abril va tener llugar la naguración oficial nel Muséu del Pueblu d’Asturies y nella apurriráse’l premiu a la sidre ganadora.
La Meyor Primer Sidre L’Añu ye l’únicu concursu que tien como protagonista la sidra ensin trasegar y que cunta con una remuneración económica. La Fundación Asturies XXI –entamaora–, compra al llagar ganador 500 euros en sidra pa que pueda ufiertala nes actividaes que rializa dientru la Primera Sidre L’Añu, asina como na tastia y el Sidracrucis.
La Meyor Primer Sidre L’Añu 2021 podrá degustase del 1 al 4 d’abril nos chigres de Xixón:
- La Montera Picona de Ramón
- El Veleru
- El Centenario
- Poniente
- Tírate al matu
- Jaime
- El Nuevo Parque
Hai que señalar que l‘asistencia a les deliberaciones del xuráu del xueves 25 va tar abierta al públicu, pero con aforu llindáu, pa cumplir colos requisitos esixíos poles autoridaes sanitaries. Dende va doce años la revista LA SIDRA y ña Fundacion Asturies XXI empezaron a trabayar na recuperanza de la sidre ensin trasegar, que práuticamente sumiera del mercáu pola industrialización de los llagares y l’aplicación xeneralizada de los trasiegos. Ca vegada son más los llagares que s’animen a comercializar esta triba de sidre y que participen nesti certame.
