Les solicitúes podrán presentase fasta’l 31 de mayu de 2021
LA SIDRA.- L’alministración abrió la convocatoria pa nueves incorporaciones a los sos cuatro sellos de calidá, un d’ellos ye’l de ‘Sidreríes d’Asturies-Calidá Natural’. Los otros trés son: ‘Meses d’Asturies-Excelencia Gastronómica’, ‘Aldea-Asturies Calidá Rural’ y ‘Clú de Calidá Casones Asturianes’. En concretu’l plazu pa la presentación de solicitúes nel separtáu de sidreríes va tar abiertu fasta’l 31 de mayu de 2021.
Un total de 134 establecimientos cunten agora con dalgún d’estos distintivos. Les sidreríes quel’algamaren son 25. Una ye d’Avilés y ye Tierra Astur. Otra ta en Cangues d’Onís y ye la Sidrería Vega Redonda. Seyes más son de Xixón: Cabanaquinta, La Montera Picona de Ramón, El Requexu, Tierra Ástur Poniente, Parrilla Muñó Poniente y Casa Ataulfo. En Grau ta la Sidrería Feudu Real, La Pomar ta en Llangréu, en Nava La Barraca, en Navia La Villa y en Siero’l Llagar La Morena. N’Uviéu atopamos otros nueve: El Ferroviariu, La Ferrería, La Pumarada, El Pigüeña, El Valle, La Noceda, La Mazana, Tierra Astur Gascona y Tierra Astur Parrilla. Finalmente en Villaviciosa cunten con esti sellu L.lena Sidrería Gastronómica y Sidrería Casa Cortina
Ente los requisitos que s’esixen pa formar parte de ‘Sidreríes d’Asturies-Calidá Natural’ ta que l’establecimientu disponga d’istalaciones fayadices pal echáu manual de la sidre en tol llocal; que la so ufierta cunte con, a el menos, dos sidres acoyíes a la Denominación d’Orixe, siendo siquier una d’elles natural d’echar; y tamién que la so carta tea basada en materies primes asturianes. Por exemplu, siquier un 70% de los platos o raciones han de cuntar con una denominación con referencies a la cultura ya identidá asturianes. Amás valórase: L’usu de productos, alimentos y bébores, de provisores llocales, denominaciones d’orixe y protexíos, productos procedentes de l’agricultura ecolóxica d’Asturies col sellu COPAE y distinguíos cola marca ‘Alimentos del Paraísu’. Tamién se toma en cuenta la variedá, llaboriosidá, innovación y renovación de les fórmules tradicionales con ellementos actuales o que s’ufierte sidre nel menú del díi.
