La diputación de Gipuzkoa destina 295.000 € pa dar puxu al cultivu de pumares de sidre autóctono, mentes el “Principado” ensiquiera nun cuenta con aídes específiques pal llanteru pumares
LA SIDRA.- Una vuelta más, el País Vascu torna a dexar n’evidencia’l desenfotu del “Principado” pa cola sidre y la mazana. Yá nun se trata del gobiernu vascu, -qu’a entamos del andanciu Covid19 apurrió 50 millones a los llagareros vascos, frente a los 0 qu’aporto’l “Principado”- Agora una cenciella diputación d’una provincia, la Diputación Foral de Gipuzkoa, acaba convocar pa esti 2021 les aídes pal llanteru, meyora y desendolcu del pumar de sidre en Gipuzkoa por 295.000 €.
Frente a esti apueste pol seutor sidreru guipuzcuanu, el “Principado” -en principiu daqué más qu’una diputación- ensiquiera cunta con aídes específiques pal pumar de sidre asturianu, englobándolos conxuntamente con “piqueños frutos”; y pa enriba l’añu pasáu foi namás de 200.000 euros, ello ye, una tercera parte menos de lo que destina una diputación provincial.
