El llagar Alonso y Casería San Juan del Obispo puen atopase nesta plataforma que yá cunta con 37 productores rurales asturianos que vienden online a tol territoriu español
LA SIDRA.- Cola fin de xenerar nueves oportunidaes de negociu nel mundiu rural y encarar la despoblación, Correos punxo en marcha la plataforma Correos Market. Anguañu esti sitiu online cunta yá con 37 productores asturianos de 21 conceyos, qu’ufierten artículos nes categoríes d’alimentación, artesanía, bébores, moda, y llar y salú.
Un d’ellos ye’l llagar Alonso, y, otru más, Casería San Juan del Obispo. El primeru, productor de sidre natural; y el segundu, tamién de sidre, pero igualmente especializáu en destilados. Amás hai ellaboraores de fora de les nueses fronteres, como Sidra Carral, de Llión.
Aparte, tamién s’ufierten otres bébores asturianes, como cerveces ecolóxiques de la empresa Asgaya, cerveces artesanales de la empresa Naviega, les de la marca Asturies Brewing Company, el vinu de Cangas de Narcea ‘El Carrascal’ de Bodega Vides o’l de Cangues d’Onís ‘Quierme vida’ de la Bodega Palaciu de Nevares. De la mesma miente podemos atopar otros productos gastronómicos como Faba Asturiana IGP, Faba Verdín o Quivis.
Esta iniciativa ufierta la so infraestructura a los pequeños productores locales, poniendo a la so dimposición la rede lloxística y les 2.393 oficines de la compañía distribuyíes per tol país, 63 d’elles en Asturies.
