Begoña Gutiérrez, natural de La Felguera, tenía fasta va dos años una rellación cola sidre distinto a la d’anguañu. Trabayaora n’hostelería, yera esperta n’echala y prestába-y esfrutala pero nunca la ellaborara. La cosa camudó en 2018, cuando s’embarcó de llenu na aventura de ser llagarera. Agora que ve esti mundiu dende un puntu vista estremáu, ta entá más namorada de tolo qu’arrodia a la nuesa bébora.
¿Cómo fueron los tos empiezos nel llagar?
La verdá que perbién, fueron bien bonos. Ye un trabayu bien duru la verdá. Nunca trabayare cola sidre y anque hai qu’esforciase enforma, ye sacrificao pero bien guapo. Mayar, por casu, requier enforma esfuerzu. Hai que ser bien trabayaor. Amás, la mio pareya y yo tamién lo compaxinamos col trabayu nel chigre polo qu’imaxina l’esfuerzu, pero paga la pena.
¿Qué rellación previa teníes cola sidre?
La sidre siempres tuvo presente na mio vida, nel senu de tenela cerca, de bebela cola familia o coles amígues, d’echalo demientres los años que fui camarera y agora que teo’l chigre, pero nunca me acercara a ella dende esti puntu vista. Na mio casa nunca se fixera sidre, nin los mios pas nin los mios güelos, a toos mos gustabas pero nunca tuvimos llagar caseru nin ná d’eso. Agora encántame ser llagarera. Amás que faigo de too, trasegar, corchar, mayar… gústame too.
Y, ¿cómo ves a les muyeres dientru’l seutor?
Prestaríame que les muyeres tuvieren más presentes nesti mundiu. Non quiciabes más presentes, porque de tola vida hebio muyeres trabayando nos procesos d’ellaboración, quiciabes más indireutamente, hai munches muyeres detrás de los llagares, pero si que tuvieren un mayor protagonismu, más rellevancia.
¿Notes un tratu distintu de la xente por ser muyer?
La verdá ye que tol mundiu me sofitó muncho cuando s’enteraron de qu’entraba nel llagar. Sí que confiaben en min y nun duldaben de que yera de sobra quien a facer to lo que me propunxera incluío xestionar el llagar, pero tamién ye verdá que n’ocasiones el fechu de ser muyer condiciona, nel sen de que por casu, dacuando, hai que xente que vien al llagar a entrugar daqué y si toi yo, paez que nun-yos valiera namás la la mio rempuesta a lo meyor y entruguen por Adrián pa ver qué opina o qué diz elli, por costume o porque suponen qu’elli va saber más que yo, nun lo sé… Seguro qu’al aviesu nun pasa. Pero son esceiciones. Yá digo que polo xeneral, nun noté asina una gran diferencia, siquier no que ye la la mio esperiencia presonal.
¿Qué ye lo postrero que tuvisti faciendo?
Pos gracies a tol tiempu que tuvimos estos meses atrás poles circunstancies, fiximos varies reformes nel llagar. Tuvimos pintando, punximos tola maquinaria bien a puntu, instalamos una corchadora nueva, camudemos los toneles… Y náa, a siguir adulces faciendo lo que mos gusta, y ufiertando a tol que quiera una sidre suavino, con poca acidez, que fai bon vasu y que tien un pelín d’amargor que-y da la mazana de la nuesa Cuenca’l Nalón, onde vivimos y trabayamos,
Y, ¿qué te gustaría faer nel futuru cercanu?
Pos pa primavera vamos abrir un merenderu pa que la xente pueda trayer la so comida y esfrutar de la nuesa sidre al campu. Y pa más allá veremos ver. Pel momento, siguir furrulando bien y tando contentos colo que facemos.
Testu: Ángela Rey
Semeyes: David Aguilar Sánchez
