Un vídiu en Facebook enseña les estremaes ellaboraciones culinaries de los chigres Yumay, El Chigre, La Ruta y el Corchu; tolos xueves les tapes son a trés euros
LA SIDRA.- Yumay, El Corchu, El Chigre y La Ruta conformen ‘El Llinderu la sidra de Villalegre’ n’Avilés. Una iniciativa qu’escuerre dar puxu a dicha zona y dotala de lo meyor de la gastronomía asturiana. Esta selmana xubieron a la so páxina de Facebook: https://www.facebook.com/llinderudelasidra/ un vídeu nel que presenten les sos propuestes culinaries pa ochobre. “Tolos xueves de ca mes ufiertamos les meyores tapes a tan solo 3 euros” destaquen.
La Ruta propón un frixuelu rellenu mariscu, carrilleres al vinu Pedro Ximénez, unes bombes de xata con quesu a la crema de pimienta y un pudin de bacalláu. El Chigre ufierta muxones en tempura de romeru con alioli de cítricos, chipirones a la chapa con mueyu de puerros y cruxente de xamón; pitu cruxente con mueyu especial de la casa; sinfonía de croquetes (compangu, quesos asturianos y xamón ibéricu); y amás una parrillada de quesos caliente.
Sidrería Yumay pela so parte propón un tortu con picadiellu, chipirones rellenos al fornu gratinados col so quesu, paleta ibérica sobro pan de centenu, pimientos rellenos de carne y arroz con coneyu. Finalmente n’El Corchu vamos poder atopar fajitas de pitu, sartén de xampiñones con gules y carrilleres nel so mueyu.
¿Vais perdelo?
