El Ranking Celicidad reconoz la calidá de Casa Niembro, en Asiegu; y de la sidrería El Fartuquín, n’Uviéu
LA SIDRA.- Casa Niembro, en Asiegu, sigue no cimero de la gastronomía ensin gluten del territoriu español, dempués de consiguir en 2018 el Premiu FACE al Meyor Restorán Ensin Gluten y en trés ocasiones ser el númberu ún del Ranking Celicidá. Nesta edición quedó nel puestu númberu dos, tres La Xastrería Tabierna, n’A Coruña.
“Casa Niembro ye un de los pioneros a nivel estatal nel so apueste por una cocina 100% ensin gluten, nesti casu tradicional. N’Asturies tamién fueron los primeros n’esaniciar esta proteína de tolos sos platos. La cocina que llidera Clara Caso ufierta platos estrella como’l so corderu xaldu a la sidre, los sos tortos de maíz o la so tarta de frixuelos. Amás son tamién los responsables de la Ruta La Sidra y el Quesu n’Asiegu” esplica Celicidad.
La Sidrería El Fartuquín, n’Uviéu, repite tamién no más alto del rankin, en cuarta posición. L’añu pasáu llograron el Premiu FACE 2019 al Meyor Restorán Ensin Gluten d’España y ufierten una carta 100% ensin gluten nel cientru de la capital asturiana. “La cocina de Mari ye tamién tradicional y arrogante, y el so compromisu col colleutivu celiacu ye total dende va años” aseguren.
Esti añu más de 19.000 usuarios rexistraos valoraron la so esperiencia nos restoranes de la App y ueb de Celicidad, y tuvieron bien en cuenta un factor fundamental: “el de la seguranza, por eso siete de los diez restoranes son 100% ensin gluten”, apunta Juan Luis Quirós, Direutor Téunicu de la App Celicidad.
