Convocatoria de dos aídes pal desendolcu de sendos TFM´s desencolcaos nos ámbetos de conocencia de Ciencies y Ciencies Sociales y Humanidaes, nos que se presenten contribuciones rellevantes en dalgún ámbetu rellacionáu col mundiu la sidre.
LA SIDRA.- La Cátedra de la Sidre d’Asturies de la Universidá d’Uviéu y la DOP Sidre d’Asturies tien ente los sos oxetivos dar puxu a la conocencia sobro toes aquelles temátiques rellacionaes col seutor, tanto aquellos campos rellacionaos cola ellaboración y l’industria como los que lo tán cola so hestoria y la so cultura. Esta convocatoria enártase dientru de dichos oxetivos.
Podrá ser beneficiariu d’estes aídes l’alunáu de la Universidá d’Uviéu, de les áries de conocencia de Ciencies y de Ciencies Sociales y Humanidaes, que vaigan presentar la so TFM nel cursu académicu 2020/2021.
La cuantía de ca aída sedrá por importe de 700,00 euros brutos. Amás, una vegada evaluáu’l TFM per parte del tribunal universitariu, y nel casu que na so defensa algame la calificación de sobrosaliente, va espublicase como premiu a la escelencia en formatu de llibru dientru la colleición Cuadiernos de la Cátedra de la Sidre d’Asturies, apurriéndo-y al/el beneficiariu/a un 20 per cientu de los exemplares de la edición y realizándose una presentación pública de los resultaos.
Les solicitúes de participación tendrán de presentase a la Fundación Universidá d’Uviéu per corréu lletrónicu, según procedimientu descritu nes bases de la convocatoria.
El plazu presentación de candidatures va permanecer abiertu fasta’l 30 de payares de 2020.
