La final cellebraráse’l martes 15 de setiembre nel restorán Casa Cortina de Villaviciosa
LA SIDRA.- N’habiéndose pospuestu pol estáu d’alarma, la décima edición del concursu “La Meyor Fabada del Mundui rializaráse’l prósimu 15 setiembre. Eso sí, cumpliendo con toles normes de prevención afitaes poles autoridaes sanitaries.
Esta ye ensin dulda la edición más llarga de cuantes se cellebraron, pos la visita secreta de los miembros del xuráu escomenzó en xineru. Según les sos propies pallabres, “foi la edición más igualada y más dura de toes, con un nivel de fabaes peraltu”.
Los 25 finalistes son: Amares Gastronomía (Xixón), Bedriñana (Villaviciosa), Casa Eladia (Xixón), Casa Narciandi (Alto de la Madera), Casa Pedro (San Xuan de Parres), Casa Román (Xixón), Casa Telva (Valdesoto), Casa Zapico (Bargues, Toledo), El Chamizu de Argüerín (Argüeru), L’Encruz (Carcedo, Sotu’l Barcu), El Rincón de Adi (Uviéu), Gauchu Fierro (Granda), La Consistorial (Mieres), La Corte de Pelayo (Uviéu), La Llosa de Oles (Villaviciosa), La Ménsula (Málaga), La Sauceda (Buelles), La Vizcaina (Les Caldes), La Taska Sidrería (Valencia), L.lena Sidrería Gastronómica (Villaviciosa), Merenderu de Cuadonga, Michem (Villabona), Picu L’Salar (Llanes), Sidrería Prida (Nava) y Tabierna Asturiana Zapico (Toledo).
La principal novedá d’esta décima edición, ye qu’amás de los premios a la meyor fabada de Villaviciosa, va fallase por primer vegada’l premiu a la meyor fabada de menú. Tamién ye novedá que la puntuación de xuráu misteriosu de la fase previa va puntuar na final xuntu cola suma del restu de persones del xuráu, presidíu por Pedro Morán (Casa Gerardo), y compuestu pol presentaor de informativo Telecinco, Pepe Ribagorda, Luis Alberto Martínez (Casa Fermín), José Antonio Campoviejo (La Corrolada del Indianu) y los espertos gastronómicos Juan Antonio Duyos, Gregorio García, David Fernández-Prada y Víctor Berdasco.
La final cellebraráse nel restorán Casa Cortina de Villaviciosa y la entrega premios ta prevista a les 19:30h.
