Pepe Riestra espubliza un llibru sobro cómo semar y curiar una pumarada de manera profesional; pero con un llinguaxe cenciellu pa “llegar a toles presones”
LA SIDRA.- “Mio pa yera mineru pero tenía una pumarada n’Aramil, onde nació. Tenía cuarenta o cincuenta árboles, grandes, enormes. Yera un home bien curiosu y dábense-y perbién. Fradaba de maravía, nun-y fallaba un inxertu”. Alcordances de Pepe Riestra que comentó a esti mediu pa desplicar cómo surdió’l so llibru ‘Una vida natural al llau d’un árbol: el pumar’. Riestra remembra cómo’l so pae esmolecíase non solo por faer ensiertos de los sos pumares a tou aquel que lo pidía, sinón que tamién los enseñaba cómo faelo. Y de xacíu, esa provechosa actitú, heredóla el so fíu. “Quedóme grabao cómo’l mio padre aidaba a los demás. Faíame dir a la corte a por moñica pa los ensiertos y asina foi deprendiendo tamién. Por eso siempres creyí que si yo sé una cosa, teo que tresmitila a los mios fíos y a quien conoza… ¿De qué me val llevalo a la sepultura? Asina nun s’evoluciona. Si nun tresmitimos, nun s’evoluciona” asegura y sigue:
“Hai munchos llibros d’árboles frutales, miles, pero específicos de el pumar nun hai tantos. Y gran parte d’ellos utilicen un llinguaxe que nun llega a toles presones. Por eso quinxi faer un llibru que fuera bono d’entender, que quien llea un capítulu, tea la sensación de que deprendió y que quiera siguir col siguiente”.
Llectura fácil y cenciella que trata sobre les partes del árbol nes que se debe trabayar como cañes o brotos. Tamién el ciclu de vida del pumar y qué ye necesariu facer nos estremasos meses del añu. Enceta coles mesmes distintes téuniques como l’abonáu, el riegu o la fradaura: “Básome na que se llama aclaréu. Ye la más estudiada y la más investigada en tol mundiu: Italia, Turquía, Estaos Xuníos, Francia, nel Baxu Aragón o Cataluña. El llibru amás contien amplia información sobro l’agricultura sostenible. La reseña completa pue consultase na revista LA SIDRA que salió espublizada nesti mes de xunetu.
VER ARTÍCULU NA SIDRA DE XUNETU
