Los pumareros -collecheros de mazana- protagonistes de la campaña promocional de branu de la DOP Sidre d’Asturies
LA SIDRA.- Ayeri presentóse la campaña promocional de branu promovía pol Conseyu Regulador de la DOP Sidre d’Asturies, empobinada nesta ocasión a la promoción de la sidre natural ónde s’anima al consumu de la sidre 100% asturiana.
La campaña pa la promoción de la Sidre de Asturies (DOP) da voz a los protagonistes del mundiu rural: los pumareros -collecheros de mazana- de sidre asturiano. Al traviés la so imaxe, el Conseyu Regulador apela a la responsabilidá del consumidor na so elleición de la sidre que demanda, informándolos sobro la importancia que pal campu asturiano polo xeneral, tien consumir sidre ellaborao con mazana 100 % asturiano. Pa esta fin, la campaña apuesta por caltener les práutiques culturales acomuñaes a la producción de mazana, el caltenimientu del nuesu paisaxe, a última hora, una vuelta al orixe.
Luis Arrontes, responsable del diseñu de la campaña (Arrontes & Barrera) manifestaba “qu’hai que dar importancia a aquello que ye esencial”, ello asina, l’eslogan de campaña escoyíu foi un mensaxe direutu “la sidre, con mazana asturiano”, y nel que la produición de la mesma desendolcose en “una xornada bien entrañable colos pumareros, utilizando’l mesmu fondu y too rodao nuna pumarada de Grau”. Amestó que “el detalle de les manes suxetando les mazanes, refuercen esi orixe artesanal, de tradición y de munchu valor que tenemos n’Asturies”.
Pela so parte, Pilar de la Cuesta, responsable de la campaña de promoción de medios (Impact 5), desplicó’l calandariu previstu y l’apueste polos soporte d’esterior, yá que llegó’l momentu de poder salir, “y tolos que tean na cai emociónense y tengan ganes de tomar el culín nel chigre”. Los soportes físicos escoyíos son mupis y marquesines n’Uviéu, Xixón, Villaviciosa, cuñes n’emisores del país, anuncios en prensa asturiano, televisión, redes sociales y autobuses nes fasteres del oriente y ocidente, Cangues d’Onís y Llanes.
Daniel Ruiz, Xerente de la DOP Sidrr d’Asturies, concluyía con que “quinxímos reflexar el perfil de los nuesos pumareros, ensin escaecenos de les segundes xeneraciones que mos amuesen el futuru de les pumaraes d’Asturies al traviés de la DOP”, “Tenemos de recordar que pidiendo Sidre d’Asturies DOP tamos aidando a pumareros como Lisardo, Cesáreo, Pilar o Belén, (protagonistes de la campaña) que representen a los más de 350 pumareros adscritos a la DOP qu’escoyeron como forma de vida la produciión de mazana asturiana destinao a ellaborar los productos amparaos.
