Dientru del proyeutu de fototeca sidrera entamáu pola Fundación Asturies XXI seguimos topando curiosidaes como esta: un vasu sidre de finales del sieglu XIX
LA SIDRA.- La semeya qu’alxuntamos, ye obra de Baltasar Cue, fecha ente 1891 y 1894 en Llanes, y nella destaca’l vasu sidre que tien na man el paisano. Destaca tantu pola so forma, (perasemeyada a los d’anguañu yá d’aquella, pesia que los vasos avarillaos llegaron fasta 1960), como pol fechu de que tratándose d’una semeya d’estudiu, la presencia del vasu sidre nun ye circustancial, sinon qu’apaez voluntariamente dientru del diseñu de la mesma, lo que supón que de dalguna manera per aquel entós, el vasu sidre yá yera un ellementu identtitariu.
Mentes esisten perinteresantes estudios sobro la botella de sidre asturiana, gracies a la obra indispensable d’Inaciu Hevia Llavona, lo cierto ye que del vasu sidre ta tovía too por faer, tratándose d’una custión principal darréu que de magar l’Asociación de Festeyos San Pedro de La Felguera llevó los vasos de sidre al País Vascu pa les esibiciones d’echaores -década de los 60- el vasu, lo mesmo que’l métodu d’ellaboración de sidre, foi adoptáu polos vascos, llegando a reclamase como propiu.
La semeya forma parte de la Fototeca d’Asturies. Muséu del Pueblu d’Asturies, bona parte de cuyos fondos puen atopase n’internet
La Fundación Asturies XXI ta trabayando nun proyeutu de fototeca sidrera, si tas interesáu /á, pues ponete en contautu con ellos en fasturies21@gmail.com
