Entamu
La sidre en tiempos del coronavirus
L’andanciu del covid-19 marcó estos meses d’una forma tan drástico como difícilmente podríamos maxinar y, como toles cris, punxo de manifiestu toles fuercies y debilidaes d’un sistema que resultó ser menos estable de lo que camentábemos.
Nel campu la sidre la quiebra resultó enorme, y anque entá ye llueu para cubicar la magnitú del desastre, lo que ye cierto ye qu’afeutó al conxuntu del seutor: pumareros, llagareros, chigres… inclusu autividaes tan perifériques como esta mesma revista, que se vio obligada a atayar la so actividá demientres estos trés postreros meses.
La pandemia afeutó a tol seutor sidreru asturianu, y punxo n’evidencia l’estáu d’indefensión en que s’atopa; ensin denguna triba planificación y desdexáu a les sos propies fuercies y capacidaes, darréu que nun recibió –nin s’espera- dengún tipu de sofitu istitucional. Mentes nel País Vascu’l so gobiernu destinó 50 millones d’euros pa paliar los efeutos del coronavirus nos llagares –amás de les aídes concedíes poles diputaciones de Gipuzkoa y Araba-, n’Asturies el “Principado” nun fixo ná. Ná dafechu.
Ye nidio que’l seutor, que representa una parte importante de la economía asturiana, precisa aídes tantu direutes, p’afaese a les nueves desixencies sanitaries, comu indireutes tocántenes a promoción y visibilización, pero resulta improbable qu’estes vengan d’un “Principado” que nun supo o nun quinxo responder cuando más necesariu yera.
Afortunadamente’l dinamismu del seutor sigue siendo un exemplu. L’actualización de la vienta online polos llagares, la invención de métodos y ardiluxos pa torgar la cadena tresimisión del coronavirus nel consumu sidre, el compromisu na calidá y la hixene de los chigres foi, ta siendo, exemplar, perriba de lo que naide nun podría maxinar, y constitúi en sigo mesmu una garantía nel caltenimientu de la sidre y la so cultura.
Por eso, anque entá guariendo de los efeutos d’esta pandemia, nun mos cabe denguna dubia de que vamos recuperar, que progresivamente vamos dir recuperando la botellina nel chigre, les fiestes de prau, los eventos sidreros, l’esfrutar de la nuesa bébora, de la nuesa tierra y de la nuesa cultura sidrera.
VER LA SIDRA de Xunu (Nb. 195)
