El capital etnográficu que suponen les semeyes antigües ta tovía por aprovechar, pesia les munches posibilidaes qu’ufierta. La Fundación Asturies XXI ta trabayando nun proyeutu de fototeca sidrera
LA SIDRA.- Na semeya qu’alxuntamos, obra de Joaquín García Cuesta (1885-1958), fecha en 1930 nun llagar de Carrandi, Colunga, podemos apreciar a tres presones sentaes tomando sidre per xarra individual, a una muyer con una zapica, a otres tres de pie con vasu sidre y/o xarra, y metanes de la semeya a un paisano echando sidre dende la xarra a un vasu, que paez avarilláu, dende una distancia de mediu metru aprosimao.
Viendo qu’el llagar ta apináu de mazana, podemos camentar que la semeya ta fecha na seronda, y de xuru qu’habrá quien seya a sacar concluxones de les pipes y de los tinos d’amparar… aparte d’otres munches custiones, comu la vestimenta, na que la güina que lleven llama l’atención.
La semeya forma parte de la Fototeca d’Asturies. Muséu del Pueblu d’Asturies, bona parte de cuyos fondos puen atopase n’internet
La Fundación Asturies XXI ta trabayando nun proyeutu de fototeca sidrera, si tas interesáu /á, pues ponete en contautu con ellos en fasturies21@gmail.com
