Esitosu métodu de Casa Cortina pa prevenir contaxos por covid-19
LA SIDRA.- La orixinalidá cola que ta enfrentándose’l seutor sidreru asturianu al andanciu del covid-19 ye enorme, y si va unos díis comentábemos nestes páxines l’orixinal “gabitu” pa echar sidre, obra de Nisen Díaz, o los vasos xerigrafiaos a collor de la DOP “Sidre d’Asturies”, agora ye Casa Cortina la que destaca con un nueu método pa prevenir los contaxos.
La idega consigue amenorgar el contautu físicu ente echaores y veceros, y ye exemplar pola efeutividá y la propia simplicidá y nulu costu. Esti método, acuñáu baxo’l llema “Tú enriba, abaxu yo”, consiste n’invitar a los veceros a que garren el vasu sidre pela parte enriba, mentes los echaores fadránlo siempres pela parte embaxo. Asina les manes d’echaor y veceru enxamás nun contauten na mesma superficie, colo que se franceríe una hipotética cadena de contaxu.
Pa enriba, el fechu d’usar l’asturianu como llingua vehicular d’esta campaña, ta faciéndola bien popular, y ta poniéndose como exemplu de compromiso asturianu frente a los vasos de la DOP Sidre d’Asturies, oxetu de muncha polémica y terriamente criticaos nes redes sociales por discriminar a la llingua asturiana
