El llagar El Duque presentó la so primer sidre l’añu nun actu con veceros y amigos
LA SIDRA.- La presentación -que se rializó respetando les midíes sanitaries propies de la Fase I de la desesguilada sanitaria- tuvo llugar nel esterior del propiu llagar, y aparte del equipu del llagar y amistaes, a la mesma asistieron propietarios d’estremaes sidreríes que cunten yá con esta sidra.
La Primera del Duque trátase d’una sidre nuevo, fecho sobro la madre, y corchao na fase inicial de la so maduración, ye una sidre con calter, como ye propio del Llagar El Duque, a la que’l retrasu na so presentación de resultes del andanciu del coronavirus, dexó arredondiar y afinar los suficiente como por qu’ensin perder no más mínimo les sos carauterístiques frutales y arumoses, dotárase d’una complexidá y un cuerpu interesante. Como ye avezao na sidre qu’ellabora esti llagar, trátase d’una sidre qu’abre estupendo y que tien un pegue finu y elegante que nun pasa desapercibíu.
Ye la primer vegada qu’esti llagar comercializa la primer sidre l’añu, xuniéndose asina al enclín que foi xeneralizándose nos postreros tiempos, desque escomenzó a cellebrase la Primer Sidre l’Añu, y estremaos llagares como Trabanco, Peñón o Vallina empezaron a recuperar esta modalidá de sidre.
Anguañu podemos atopar La Primera del Duque nos chigres xixoneses Nueva Ibérica, El Senderu, La Flor del Coto y Casavella; asina como nel villaviciosín Bedriñana, o pidila directamente por que te la sirvan a casa llamando al teléfonu 630 440 262
