Propiamente, la sidre d’espolleta/espoleta, ye la sidre esplumoso, y esiste una variedá de sidre d’espolleta, que ye tradicional asturiana, producía pola formientaura de la sidre yá en botella.
Enantes de ná, hai qu’afitar que na sidre –la que se-y vieno a nomar “natural”- la espolleta, considérase un defeutu, yá que non solo nun espalma bien, sinon que xenera muncha espluma, que se desvanez aína, notándose incluso un xibliu al faelo, tratándose polo xeneral d’una sidre con zucre residual. Anque hai esceiciones, como nel casu d’espiches tradicionales, onde se corcha la zapa unes selmanes enantes de la espicha pa que “garre fuerza” ello ye, pa que xenere daqué carbónicu.
Por embargu, la sidre d’espolleta vien produciéndose nos llagares tradicionales cuasique dende siempres, y consíguese corchando la sidre enantes de finar el procesu de formientaura –colo que continúa na botella, xenerando’l carbónicu- o amestando zucre a la sidre fecho, nel momentu de corchar –una cuyaraína por botella suel ser lo avezao-, colo que reactivamos la formientaura, produciendo’l mesmu efeutu.
De fechu, ye avezao nos llagares caseros, mayar una barriquina más piqueña pa corchar enantes de tiempu; y agora qu’el zucre ye peracesible, cuando la sidre yá ta fecho amestar una cuyaraína de zucre por botella nel momentu corchar, pa la sidre que quiera faese “d’espolleta”.
Otru métodu d’ellaboración de sidre d’espolleta, ye’l champenoise, que consiste nuna doble formientaura en botella de la sidre, amiestándo-y a la sidre fecho, azucre y dieldu.
¿QUÉ YE LA SIDRE D’ESPOLLETA? / ELLABORACIÓN TRADICIONAL DE SIDRE D’ESPOLLETA / ELLABORACIÓN MODERNO DE SIDRE D’ESPOLLETA TRADCIONAL / SIDRE D’ESPOLLETA VERSUS SIDRE AXAMPANAO
