Tratóse de la posibilidá d’afitar midíes pa solliviar la cris nel seutor, pero ensin concretar denguna
LA SIDRA.- Los representantes del Conseyu Regulaor de la Denominación d’Orixe Protexía Sidre d’Asturies espunxeron al conseyeru de Desendolcu Rural, Alejandro Calvo, la situación crítica qu’atraviesen los llagares asturianos acoyíos a esta DOP, proponiéndo-y la posibilidá d’afitar midíes de sofitu que permitan a los llagares xestionar el so stock de sidre pa que la prósima campaña los llagares puedan emplegar tola mazana reconocía pa dicha DOP.
La reactivación del seutor hosteleru -los chigres lleven dos meses presllaos- y la promoción del consumu de sidre DOP non solo nos chigres, sinon tamién en casa, fueron otres custiones plantegaes pola DOP Sidre d’Asturies, sicasí nun llegó a concretase denguna midía al efeutu.
Como ye persabío, la cris del coronavirus paralizó les vientes del seutor de la sidre, mayoritariamente destianaes al seutor hosteleru, y anque los llagares tan faciendo un perimportante esfuerciu pa facilitar el comerciu online, ello nun ye pa compensar l’amenorgamientu de consumu nos chigres.
Nun hai una selmana, l’Asociación de Pumareros d’Asturies, dirixóse tamién a la Conseyería de Desendolcu Rural, pa reclamar aida urxente pal seutor sidreru al “Principado”, acutándo-yos la so falta d’iniciatives, especialmente nestos momentos de cris, y pidiéndo-yos un aconceyamientu nel que tovieren presentes los estremaos representantes del seutor, lo que fasta agora nun algamó denguna rempuesta por parte de dicha conseyería.
Como contrapuntu a esta falta d’actividá del “Principado” tenemos al gobiernu vascu, que vien d’apurrir 50 millones d’euros pa sofitar el seutor vitivinícola, sidreru y cerveceru, con midíes como la puesta en marcha d’un portal de comercialización pal conxuntu de llagares vascos o bonos de sofitu a la innovación comercial.
