La DOP Sidre d’Asturies entamó un taller p’afondar na conocencia de la sidre al traviés d’un analís sensorial
LA SIDRA.- L’Aula La Sidre del CIFP d’Hostelería y Turismu de Xixón foi l’escenariu onde se cellebró a entamos de selmana la IX edición de la Masterclass entamada pol Conseyu Regulador de la Denominación de Orixe Sidre d’Asturies, empobinada n’esclusiva a hosteleros, con oxetu d’afondar les sos conocencies sobro la sidre natural.
La masterclass foi impartida pol enólogu José Antonio Norniella. “Yo toi ciertu que tienen de sobra conocencies de lo que ye una bona sidre, cómo sirvila, cómo echala, como tenela nes meyores condiciones, etc. Por eso voi centrame en dar información téunica que bien poques vegaes se da n’Asturies. Lo que vamos amosar ye cómo faer un analís sensorial discriminatoriu”. Pa ello Norniella facilitó a los asistentes unos folios onde los hosteleros tuvieron que definir una serie de compuestos qu’elli mesmu preparó, compuestos ácidos, amargos, con alcol o de sidre defectuoso.
En total asistieron 35 profesionales d’hostelería –algamando la totalidá de les places ufiertaes–. Con esti tipu d’aiciones, el Conseyu Regulador de la DOP Sidre d’Asturies pretende sensibilizar a los hosteleros sobro los aspeutos positivos qu’acompanguen al so consumu, asina comu dar una mayor información sobro ella a los sos veceros.
