El prósimu xueves 12 d’avientu, el Clú de la Sidre rializará una tastia guiada de perea a cargu del especialista Manuel G Busto.
LA SIDRA.- La tastia tendrá llugar nos llocales de la revista LA SIDRA (Prendes Pando 11 baxo drecha), de magar les 20 hores del xueves 12 d’avientu, tendrá un preciu de 10 € -de 5 € pa los miembros del Clú de la Sidre- y nella procederáse a la preba de:
- Verde Espera. Collecha 2018 d’esta perea ellaborada de magar la conocía pera Ercolina D.O. Jumilla, Murcia pol llagar Bodegas Villa Elena.
- Délice de Poire. Del llagar francés Ecusson, ganaora en 2018/2019 de los Premios SISGA.
- Exibatur Mostbaron. Del llagar austriacu Mostbaron, Premiu SISGA’17
- L’Atypique. Del llagar normandu del mesmu nome.
El númberu places ye llimitáu y per rigurosu orde d’iscripción, qu’habrá de faese al traviés d’ info@lasidra.as
Pesia que la llexislación española nun contempla la esistencia de sidre de pera –a nivel internacional ye un términu xeneralizáu-, lo cierto ye que la sidre de pera, o perea, ye un productu tradicional n’Asturies del que yá dexa costancia Plinio’l vieyu (añu 23 de la nuesa era) que yera consumíu polos astures, y que siguió produciéndose fasta anguañu. Bébora oficial del Exércitu Asturianu de la Xunta Suprema d’Asturies en 1808 y cuyu consumu foi amenorgando pasu ente pasu, fasta qu’hai unos años el llagar Viuda de Angelón entamó a producir la so Sidre de Pera, que desdexó por mor de les trabes llegales españoles.
