Escomienza’l Festival de la Mazana

Villaviciosa empecipia güei les actividaes, el pregón va correr al cargu de la diseñadora Mónica Cordera

LA SIDRA.- Una de les novedaes de la presente edición del Festival de la Mazana de Villaviciosa va ser la recuperación del pregón na apertura, como se facía nel aniciu de la festividá en 1960, nel Teatru Riera.

Va ser a les 19:30h y va sirvir pa presentar a les reines y reis del festival, les que fueron escoyíes nes pasaes Fiestes de del Portal. “Apostóse por un actu innovador que cuntará cola presentación del magu, José Armes que va ufiertar un espectáculu de maxa, ‘Maxa con mazanes’. Tamién podrá esfrutase nel apartáu musical de la Banda Gaites Villaviciosa-El Gaiteru” indicaron dende la casa conceyu.

Pal pregón, foi escoyía la nueva diseñadora maliayesa, Mónica Cordera Rodríguez. Nacía en Niévares en 1986, ye entitulada superior de Diseñu y Moda pola Escuela “Felicidá Duce”, y a los sos 33 años llogró faese un buecu nesi difícil mundiu.

Amás, mañana a les 11:00 va realizase la naguración oficial de la XXXIV esposición de mazana de mesa y de sidre d’Asturies onde van ser escoyíos los meyores frutos del país. Media hora más sero va haber una degustación de les sidres adscrites a la DOP Sidre d’Asturies y la mesa redonda la Muyer nel mundiu la mazana, cola presencia de profesionales venceyaes al sector.