El mayor congresu de la sidre en territoriu español incrementó los sos espositores, asistencia de públicu y países participantes
LA SIDRA.- El trabayu duru collecha ésitos. Y asina quedáu demostrao nesta novena edición del Salón Internacional de les Sidres de Gala entamáu pola Fundación Asturies XXI y que se rializó del 25 al 19 setiembre. Un congresu al qu’asistieron 52 llagares procedentes d’una docena países como Estaos Xuníos, Xapón, Francia, Italia, Portugal o República Checa; pero sobromanera que cuntó con una interesante participación de países bálticos como Letonia, Estonia, Finlandia y Polonia. Y tamién, poques gracies, d’Asturies y del Estáu.
Actu de gran relevancia foi la recepción oficial del Conceyu de Xixón el vienres 27 setiembre a trés alcaldes de la República Checa. Amás, l’embaxaor de dichu país n’España, Ivan Jančárek, asistió ese mesmu vienres a la cena qu’entamó la Fundación nel restorán Amares Gastronomía del Hotel NH Xixón. Por cierto qu’a la citada cena tamién asistieron representantes municipales, ente ellos l’alcaldesa de Xixón Ana González, ya igualmente miembros de l’alministración rexonal, los congresistes nacionales ya internacionales y otros integrantes del seutor sidreru asturianu.
El motivu pol que l’embaxador allegó a la velada foi pa sofitar a los llagareros checos qu’al otru díi, sábadu 28, espondríen los sos productos xuntu con tolos demás productores na llamada ‘Tastia Abierta al Públicu’ que tuvo llugar en La Colexata de San Xuan Bautista del Palaciu de Revillaxixéu. A destacar qu’al díi de la tastia asistieron 1.428 persones contabilizaes por una empresa esterna especializada.
Per otru llau, el concursu SISGA’19 celebráu nel llagar de Castañón tamién llogró una gran aceptación ente los ellaboradores participantes, cuantimás debíu al cambéu nel sistema de valoración de les sidres. Cuatro fueron los tipos de reconocencies que se concedieron según la calidá de los productos. Les medayes d’oru, plata y bronce otorgáronse si la bébora superaba una puntuación definía pol xuráu. Esto ye, les sidres nun compitieron ente elles mesmes poles medayes; sinón que, si llegaben o devasaben una determinada nota, llograben dalguna d’eses reconocencies. Amás tamién se concedió un ‘Prémium SISGA’ en ca categoría. Nesti casu otorgáronse a les sidres que mayor puntuación llograron según el so tipu. En total compitieron 85 bébores de 12 países distintos
Asina, los ellaboradores d’Asturies llograron siete reconocencies nes 18 categoríes de les que se compunxo la preba: Angelón Llimón en sidre con frutes, Caldia en sidre de fueu, Guzmán Riestra Brut en sidre brut de carbónicu endóxenu, Pomar Roseé en sidre esplumoso rosada, Sidra de Hielo Cortina en Sidra de Xelu, Valnera en sidra semiseca ensin gas y Viesk en compuesta de sidra.
Les sidres asturianes que llograron medayes fueron: La Naveta Roxa, medaya d’oru de sidre rosada esplumosa; Sidre de xelu Panizales, medaya d’oru de sidra de xelu; 1947 de Viuda de Angelón, medaya d’oru de sidre seco ensin gas; Prau Monga, medaya d’oru de sidre brut de carbónicu endóxenu; Pomar, medaya d’oru de sidre dulce de carbónicu esóxenu; Valverán 20 mazanes, medaya d’oru de sidre de xelu; Guzmán Riestra Semiseca, medaya de plata de sidre semiseco de carbónicu endóxenu; y la Naveta Brut, medaya de bronce de sidra brut de carbónicu endóxenu.
Coles mesmes, la xornada de sumilleres que se cellebró nel restorán El Duque’l domingu 29 tamién resultó por demás interesante tantu pa los llagareros como pa los especialistes nesti seutor. Esti añu la organización decidió centrala n’aguardientes y llicores de sidra con productos de Asturies, País Vascu Francés, Polonia, Italia y Xapón. Asina mesmo hai de siñalar la intervención que na mesma xornada pronunciaron los miembros del Clú Sierense d’Amigos de la Mazana sobro’l procesu d’ellaboración d’aguardientes de sidre y sidres de xelu, que provocaron, inclusive, l’almiración y la reconocencia de los participantes internacionales
