El Fondu para la Protección d’Animales Xabaces siñala que la so población baxó nos postreros dos años
LA SIDRA.- El raposu ye un de los animales que, xuntu coles aves de garduña, tien una gran capacidá para prindar de royedores, calteniendo asina una población controlada. Hai de remembrar qu’un de los principales problemes de los llabradores ye la llucha costante con especies como’l topín o l’aguarón topu, que causen importantes estragos nos llanteros. Nos postreros dos años, los raposos viéronse afectaos por malures como la sarna, lo que ta causando que baxe’l númberu d’estos especímenes.
N’Asturies, l’aguarón topu, ye un problema recurrente. Taramia los raigaños de los pumares y sécalos. Pa combatilos esisten trampes o velenos, estos postreros menos recomendables que les primeres. Sicasí, lo que ta nidio ye que si hai un desequilibriu na flora o na fauna, los efeutos negativos resiéntense de momentu causando múltiples perdes.
D’ende que’l Fapas pida al gobiernu la proteición del raposu, cuantimás naquelles fasteres onde s’alcuentren intenses poblaciones de royedores qu’estrocen los pumares. La fundación recuerda que’l raposu, “lloñe de tar protexíu” n’Asturies, ye una especie cinexética polo qu’amás puede se cazáu ensin control. Coles mesmes Fapas denuncia que nun ye posible xestionar la fauna montes de manera anárquico”, polo que tendríen que roalizase estudios y trabayos científicos de rigor pa garantizar l’ecosistema y la biodiversidá del país.
