Los corresponsales de LA SIDRA averárense nesta 49 edición al Festival Intercélticu d’An Oriant, esti añu dedicáu a Galiza, pa siguir les novedaes sidreres n’Europa y alrodiu’l mundiu folk.
Si bien delles de les naciones celtes avecen a tener nos sos carpes-chigre bones sidres, comu ye’l casu de Cymru (Gales), Ellan Vannin (Islla de Man), Éire (Irlanda) o Alba (Escocia), esti añu nun foi una esceición y les dos naciones celtes más venceyaes al consumu sidra foron Breizh (Bretaña) y Asturies.
Si bien a nivel europeu dase internacionalmente un bultable espoxigue en calidá y cantidá de produición sidrera, delles de les naciones representaes baxaron esti añu la so ufierta sidrera, teniendo menos variedaes o inclusu teniendo sidre bretona en llugar de la que-yos ye propia.
Ye precisamente esi amenorgu lo que fai contraste en comparanza cola bayura sidre y la so ubicuidá dientru’l festival de man d’Asturies y Bretaña. Del nuesu llar pola bona sidra del llagar Cortina ufiertada na Carpa d’Asturies, qu’esti añu cunta col meyor echaor del mundiu, el campión Salvador Ondó. Per otra parte, Breizh ta presente en tolos bares del festival cola so marca cimera Loïc Raison con dos palos, ún de sidre tradicional y otru axampanao, y col so sofitu y padrociniu de concursos de música tradicional.
