L’asturianu Fernando Vázquez Cárcaba empató cola gallega María López Carballo nel primer puestu del prestixosu concursu bretón de gaita.
Esti añu nun pudo ser. El gaiteru Fernando Vázquez Cárcaba, concursante curtíu nel MacCrimmon, empató con María López Carballo nel primer puestu del prestixosu concursu bretón de gaita. Sicasí, el reglamentu favorez la mocedá de los participantes y el premiu coló pal país vecín, Galicia.
Ye’l tercer añu que Fernando Vázquez Cárcaba concurre nel MacCrimmon. En 2015 finara 6u na clasificación y l’añu pasáu xubió al podiu con una 3ª posición. El de Llieres, por embargu, ta collechando muchos éxitos: dirixe dende l’añu pasáu la Banda Gaites Conceyu Siero y finó los sos estudios de Musicoloxía na Universidá d’Uviéu, polo que podemos aldovinar un futuru entá más prometeor, anque esta vegá quedare col miel de l’ésitu nos llabios.
El Festival Intercélticu d’An Oriant sabe bien qué se fae, y cuandu ve’l talentu lu premia. Y ye que si la dixitación estraordinaria tien méritu entá cuandu vien de xente mozo, más cuandu la ganaora tien 15 años. María López Carballo, ganaora d’esta edición, entamó sos estudios musicales nel añu 2010 na Escuela Música Bellón Maceiras y caltién, dende estós, formación musical en dellos instrumentos tradicionales comu la zanfona y les gaites gallega y asturiana con prestixosos profesores comu Rodrigo Joglar.
Norabona a dambos polos ésitos collechaos.
