L’espediente reflexa la condición de la sidre como iconu de la comunidá asturiana y destaca’l llabor de los 181 ‘embaxadores’, ente ellos, la revista LA SIDRA y la Fundación Asturies XXI
LA SIDRA.- El Gobiernu de Asturies unvió al Ministeriu de Cultura la documentación xustificativo de la propuesta de la cultura sidrera asturiana pa la so incluxón na llista representativa de la Unesco, que daría pasu a la posibilidá de ser declarada Padremuñu Cultural Inmaterial de la Humanidá.
L’alministración completa d’esta miente la fase téunica del procesu que desendolcó a lo llargo del postrer añu’l comité direutor pa la ellaboración de la candidatura, dirixíu poles conseyeríes d’Educación y Cultura y Desendolcu Rural, y sofitáu polos responsables de la Denominación d’Orixe Protexía DOP Sidre d’Asturies.
Nel comité participaron antropólogos, historiadores, especialistes nel mundiu de la madera y téunicos de l’Alministración que supieron condensar la idiosincracia, el simbolismu y la pluralidá de la cultura sidrera asturiana.
Gracies al llabor de 181 embaxadores de la sidra, reconocencia qu’ostenta la REVISTA LA SIDRA y la Fundación Asturies XXI, xestionáronse llibros de firmes nos que se recoyeron los testimonios de sofitu de 17.697 persones, a los qu’hai de sumar 2.465 adhesiones al traviés de la páxinaueb abierta pa espublizar la propuesta. Nes redes sociales afayaes pal sofitu de la candidatura rexistráronse fasta xunu alrodiu de 2.000 siguidores, con más de 20.000 interacciones.
Tres la entrega al Ministeriu de Cultura de la documentación téunico ábrese un nuevu procesu, supeditáu a l’apertura per parte de la Unesco d’un plazu por que el Estáu español pueda presentar nueves candidatures a Padremuñu Cultural Inmaterial de la Humanidá. Na actualidá ta evaluándose la candidatura de los Caballos del Vinu de Caravaca de la Cruz, en Murcia, y desconozse entá cuándo podrá presentase per parte del Estáu español una nueva propuesta. Nel momentu en qu’hebia esa posibilidá, la cultura sidrera asturiana va tener que competir con iniciatives procedentes d’otres Comunidaes Autónomes. La decisión sobro la fecha de la candidatura asturiana ye potestá del Conseyu del Padremuñu Hestóricu Español.
