La Unión de Consumidores recordó que “apautar los precios” ye una estratexa illegal, un asuntu que yá tuvo nos tribunales
LA SIDRA.- Llega’l branu, y con elli, l’alderique del preciu la botella sidrw. Magar nel postrer añu delles fueron les voces -munches de llagareros- que s’alzaron para da-y a la bébora más emblemático de Asturies “el valor que se merez”… tamién munchos fueron los detractores al incrementu.
“¿Por qué si una caxa sidre cuéstame doce euros y otra cuéstame nueve nel mesmu llagar… hai que vender la sidre al mesmu preciu nel chigre?”. Esi ye un de los argumentos que los hosteleros remanen pa xustificar que la sidre debería de tener estremaos precios. Sicasí, esta frase, qu’escuchamos ca branu, ta llueñe de faese rialidá. Lo normal n’Asturies ye dir a una sidrería y que toles marques cuesten lo mesmo, sacántenes les acoyíes a la DOP, que son un pocu más cares, pero toes igual.
Eso sí, lo que nun se puede faer ye “apautar los precios”, un asuntu que llegó a la UCE y d’ende qu’agora lo ponga de manfiesto el presidente de la entidá Dacio Alonso. N’una rueda prensa, dixo qu’en Llugones el seutor hosteleru apautó’l preciu la botella a 2,90 y eso “nun pue faese”. El presidente recordó qu’esta práutica yá se denunció en 1996. D’aquella, llegaron incluyir na demanda a pumareros, llagareros y chigres con importantes sanciones.
De manera que l’alderique sobro’l preciu nun ye un asuntu nuevu. Fai 30 años, ya inclusive más, tamién se falaba de xubir la sidre. Los llagareros recuerden que los chigreros desplicaben que pa poder pagar un camareru, esti tenía qu’echar doce caxes de sidre. Y claro, lo normal ye que nun se llegue a esa cifra nin de llueñe. Tamién hai que tener en cuenta que yera muncho enantes de la cris y yera avezao que los que tomaben unos culetes, depués terminaren cenando. Agora yá nun ye asina y eso resiéntelo’l chigre. Veremos qué aiciones torna tomar la UCE, y vamos ver tamién si la xubía faise patente n’otres llocalidaes.
