Los Llagares de Siero tornen a xuncir fuerces pa cellebrar la II Folixa de la sidre del conceyu
LA SIDRA.- Esti sábadu 11 y domingu 12 de mayu de 2019 va cellebrase na Plaza Cubierta de La Pola la II Edición de ‘Espalma la sidre’ que señala, de nueu, un claru oxetivu: dar valor al productu más nuesu. Los horarios nesta edición van ser sábadu de 13:00 a 16:30 y de 19:00 a 02:00 de la madrugada y domingu de 12:00 a 20:00.
Demientres dos xornaes venderán llitros y llitros de sidre, que van ser echaos tantu en mesa como en barra por profesionales camareros echaores. Dellos de los Llagares de Siero van participar nesta edición: Sidra Arbesú, Casería San Juan del Obispu, Sidra Fanjul, Sidra Fran, Sidra Fonciello, Llagar La Morena, Sidra Muñiz, Sidra Quelo y Sidra Viudo de Palacio.
Caún de los llagares va rexentar y va xestionar el so propiu stand, ufiertando’l so productu de la manera óptimo, nel so puntu esautu de fríu y con un sobrosaliente echáu. Sedrán dos xornaes nes que podrá esfrutase de la meyor sidre del conceyu acompañada de la gastronomía tradicional asturiana de la man de dos llocales hosteleros de La Pola: Restorán Karting Pola y Restorán Abrelates.
Amenizando les dos xornaes de cellebración vamos tener a ‘Los Gascones’ demientres les sesiones vermú de sábadu y domingu que van tocar versiones con gaita y tambor de cantares archiconocíos. Per otru llau, demientres el sábadu nueche dará pasu a una verbena amenizada pol grupu ‘Los Buscavidas’ y el DJ ‘David Alonso’.
