Profesores d’estremaes escueles d’hostelería asisten al CIFP allugáu en Begoña pa recibir el cursu ‘Valoración de la sidre y el quesu d’Asturies’
LA SIDRA.- El CIFP d’Hostelería y Turismu d’Asturies sigue col so enfotu de poner en valor la Cultura Sidrera Asturiana. Ayeri presentaba la nueva ‘Aula Polivalente de Sidrería’ nes sos instalaciones de Begoña en Xixón; un espaciu que tamién sirvió p’allugar una nueva xornada del curso ‘Valoración de la sidre y el quesu d’Asturies’, que ta impartiendo al profesoráu de les escueles d’hostelería demientres los meses de mayu y xunu.
Estremaos especialistes en quesu y sidre son los que dan les clases como Andrés Navarro o Aitor Vega tocantenes a quesos; y l’enólogu José Antonio Norniella como espertu en sidre. Ayeri precisamente foi esti postreru quien desplicó a los asistentes estremaos aspeutos rellevantes sobro la nuesa bébora más emblemático.
José Antonio Norniella escomenzó dando unes curties pincelaes de la hestoria de la sidre dende la Edá Media fasta’l sieglu XX. Darréu incidió n’estremaos aspeutos llexislativos contemporanios pa la so ellaboración; afondó na composición del mostiu de mazana y concluyó con un analís sensorial nel que demostró de manera práutica los arumes, colores y saborgos d’una sidre acedo, d’otra duce-amargosa, y finalmente una sidre vieyo. Darréu tocó la vez al especialista en quesu Aitor Vega ya Isaura Souza, presidenta de l’Asociación de Queseros Artesanos d’Asturies; d’apurrir les sos conocencies a los docentes nesta materia.
