Güei ye la cabera oportunidá p’averase a la X Primer Sidre l’Añu ¡Nun dexes que te lo cuenten!
El díe pidía sidre: sol y folixa nel Pueblu d’Asturies foron la opción de más de 6.000 persones pa pasar esti sábadu vacacional. Pente elles,muncha xente d’Asturies, pero tamién turistes y foriatos dellos que s’averaron a conocer de primer man la cultura sidrera en vivo.
Dende pela mañana, les tasties guiaes de Sidre de Xelu “Diamantes de Hielo”, d’auguardiente “Casería del Obispo”, d’aperitivu “Roxmut” y de la Meyor Primer Sidre l’Añu 2019, “Prado y Pedregal”, acompangaes de dellos productos gastronómicos asturianos, a cargu de Manuel G. Busto, dieron a los asistentes interesantes apuntes, non solo de gastronomía ya enoloxía, sinon d’hestoria.
La segunda fase del certame musical Asturianada y Sidre punxo la banda sonora a la sobremesa coles voces de les meyores promeses de la tonada acompangaes pola ya consagrada Anabel Santiago. Los momentos más intensos foron l’actuación de Nestor, que con namás 9 años respigó cola potencia la so voz, y l’Himnu d’Asturies canciáu en comuña colos cientos de presones que ya a media tardi enllenaben el Tendayu.
Pero ensin dubia, los xuegos foron un de los mayores atractivos, non solo pa la reciella, sinon qu’ayeri foron especialmente los adultos los qu’esfrutaron de les carreres de sacos ya’l tiru cuerda, dexando pal recuerdu imáxenes memorables. Nun faltó tampoco la mayada coleutiva nel llagar movil de los Sidrocoles.
La cosa foi animándose sigún pasaba la tardi y de les meses y les mantes embaxo foi pasándose a les cantaríes y bailles del país, entamándose una folixa d’antoloxía qu’aguantó a bon ritmu más allá de la hora de preslle.
Pa los que nun pudieron dir ayeri, o pa los que quieran repetir, güei de 12 a 17 ye la cabera oportunidá pa asistir a la X Primer Sidre l’Añu, que güei cuenta col atractivu estra del Concursu de Sidre Casero fecho’n Maera, nel que se premia a la meyor sidre fecho en casa pol sistema más tradicional y que ye de los pocos concursos de sidre casero d’ambetu nacional. Por supuestu, siguirá la sidre de 70 llagares, los xuegos, les tasties, la música, la bona xinta y la folixa. Esperámosvos.
