El chigre entama una tastia con productos de Cárnicas Las Ubiñas, Embutíos Casa Milia y Quesería Ovín
LA SIDRA.- El prósimu martes 22 de xineru podrán degustase alimentos procedentes de les montañes asturianes en “bocaínos” n’El Ferroviario Chigre-Espicheru. Los productos escoyíos pa la ocasión son carpaccio de vacuno mayor, cecina de güe, caces de gochu y xuan, embutíos diversos y quesu artesanu. Los piqueños productores asturianos desplicarán el so trabayu, métodos d’ellaboración y les bondaes de los productos que mos ufre’l país.
Sigún los entamaores, la intención ye “dir escaxinando y conociendo” a dellos de los ellaboraores del país que meyor tan faciendo les coses, con, dicen enfotu y tesón. “Queremos que mos cunten la so hestoria, y que puedas prebar dellos de los sos productos” conviden.
Na tastia tarán presentes Diego Aladro de Asturgües, Javier García y Aitor Fernández de Cárnicas Las Ubiñas; Manuel Alonso d’Embutidos Casa Milia y pola Queresía Ovín tará presente Isaura Souza.
La tastia ye de baldre, namás hai de siguir una de les redes de GastroOviedo (Facebook, Twitter o Instagram) y solicitar plaza unviando un corréu lletrónicu indicando los sos datos de contautu a hola@gastroviedo.es. El Ferroviario Chigre-Espicheru con esta tastia quier poner en valor la calidá de los productos que se ellaboran enel país, el trabayu, la dedicación y el compromisu de los piqueños productores que debuxen el mapa agroalimentariu asturianu. Tolos participantes son proveedores davezu del establecimientu.
