Les direiciones de Padremuñu y Desendolcu rural llancen una iniciativa pa sofitar la presentación de la candidatura énte la UNESCO
LA SIDRA.- La direición xeneral de Padremuñu y la de Desendolcu Rural anunciaron que la prósima primavera presentaráse la Cultura Sidrera Asturiana a la Llista de Padremuñu Inmaterial de la Humanidá de la UNESCO.
Esta propuesta tien dos ámbetos de xestión: ún alministrativu d’ellaboración del espediente y otru social que se plasma nos sofitos a la candidatura. “Asina pues, mentes qu’una parte del trabayu rialízase dientru d’un ámbetu académicu y alministrativu, la otra, tien de tar protagonizada pola socieda, por toles presones que viven y sienten Asturies, darréu que la cultura sidrera y l’0echáu de sidre ye una de les señes d’identidá que meyor representa Asturies nel mundiu, espresa ún de los sentimientos más nobles, pos supón una gozósa cellebración del grupu, de l’amistanza y de la vida mesmo. Queremos que’l mundiu conoza y reconoza los vínculos d’amistanza universal qu’enzarra la bébora emblemática d’Asturies, seya cual fuere’l llugar o’l momentu” siñalen dambes direiciones xenerales.
Pa ello, punxéronse en contautu con estremaes asociaciones, entidaes y colleutivos pa que s’amiesten a la iniciativa “Embaxoaores”. “Prestaríemos que toles presones que se sientan identificaes con esta rialidá y col enfotu d’algamar esta reconocencia, dixebradamente del conceyu o la edá, puedan amestase a esta iniciativa al traviés del so sofitu a entítulu presonal o de forma colleutiva” despliquen y sentencien: “ensin esi sofitu la candidatura a Padremuñu Mundial Inmaterial nun tien futuru”.
Pa sofitar la candidatura, una entida pue proponese a sigo mesmoa como Embaxaora, o tamién pue ser presentada por otros. ¿Y qué implica? Pues la xestión del llibru firmes pa recoyer sofitos populares ente la comunidá ámbetu d’actuación de l’asociación o entidá, informando sobro la iniciativa y afitando’l sofitu popular al traviés de firmes.
