De magar güei ábrese la iscripción de calter gratuitu, y que finará’l 23 de xineru o fasta que s’apunten 7 participantes
LA SIDRA.- Yá ta abiertu’l plazu pa participar nel III Concursu Estatal “A la gueta del Meyor Cachopu ellaboráu con Xata Asturiana IXP”. Que dubia hai de que pa cocinar un bon cachopu la materia prima ye fundamental. “D’ende que la carne de Xata Asturiana seya la más utilizada y la que más calidá ufre, n’especial pola so carauterística tienreza” siñalen dende la Indicación Xeográfica Protexía.
El concursu, despliquen, pretende llegar a tolos establecimientos del territoriu español qu’ellaboren esti platu. Y pa ello güei abrieron la iscripción pa tolos llocales que deseyen participar. Ta disponible online na ueb del Conseyu Regulaor de la IXP Xata Asturiana. Los llocales participantes tendrán d’unviar el boletín qu’atoparán na ueb correchamente cumplimentáu, asina como la receta escoyía -ingredientes y desendolcu-.
Les iscripciones tienen d’unviase al mail elmejorcachopo@
La organización, tres analizar tolos cachopos mediante visita “in situ”, ensin identificase fasta la fin de la degustación del cachopu, esbillará 12 participantes, que sedrán los que participen na final de Madrid. El plzau pa la visita misteriosa esparderáse del 24 xineru al 20 marzu dambos incluyíos.
El xuráu degustará’l cachopu presentáu, que tendrá tar a dimposición de los veceros demientres les ocho selmanes que dura’l concursu, siendo presentáu como suxerencia a los comensales o amosase per escrito na carta o nel establecimientu. El costu de la tastia del mesmu pol xuráu correrá a cargu la organización.
Seleicionaránse los seyes meyores cachopos d’Asturies y los seyes meyores cachopos de fuera d’Asturies pa la gran final. Tres una esbilla previa mediante’l sistema de “mistery shopper”, los finalistes sedrán citaos pa ellaborar in situ y dar a degustar al xuráu los sos cachopos nel Salón del Gourmets el llunes 8 d’abril a les 14:00 hores.
