Cola campaña yá finada, el seutor reflexona y prepárase pal prósimu aqu que, por mor de la vecería, pue tornar a repetir una “collechona”. L’oxetivu ye que la mazana asturiana tea asegurao la demanda nos llagares a precios rentables.
LA SIDRA.- Fina la temporada de collecha de mazana, una de les más importantes dientru’l ciclu agrícuola asturianu que marcó la vida d’esta sociedá demientres xeneraciones. Si en daqué coinciden los especialistes involucraos nesti seutor, ye que nesti país la pañada d’esti frutu ye complicao. La singularidá orográfica d’Asturies fai que seya abegoso poder cuntar con maquinaria que supla la man del home o la muyer; una torga a la que nun tienen d’enfrentase notros llugares, fuera de les nueses fronteres, onde la orografía ye más llano. Esto inevitablemente incide na produición, y ye nidio, nel preciu.
Los collecheros asturianos lluchen por sacar alantre los sos cultivos, pero non siempres son a ello. L’añu pasáu la llamada “collechona” prevocó, como’l so nome indica, una sobroproduición que munchos agricultores nun fueron quien a colocar nos llagares. Esta situación tuvo la so rempuesta n’estremaos manifestamientos, n’especial en Villaviciosa, nos que se denunciaba que munchos de los frutos que pudríen en prau; yá seya porque’l preciu que taba pagándose la mazana yera inferior inclusu a los costes de pañalo; o porque cenciellamente los llagareros teníen les sos necesidaes cubiertes yá fuera con frutos d’equí o de fuera.
