La Fundación Siloé sedrá la ONG beneficiaria de los fondos que se recalden na espicha solidaria entamada pal prósimu 12 d’avientu a les 15:30 h, por Tierra Astur Xixón y Banco Santander
LA SIDRA.- L’oxetivu de la espicha ye recaldar más de 7.000 € pola merca d’entraes pa la espicha y tamién pola merca d’entraes pa la fila cero, amás de la puya solidaria que s’entamará una vegada finada la espicha.
La Fundación Siloé –organización ensin ánimu de llucru asitiada en Xixón- dedícase a l’atención de presones en situación de vulnerabilidá o n’estáu de necesidá, especialmente menores y mocedá en situación de riesgu social, de les presones con discapacidá inteleutual, reclusos, refuxaos, inmigrantes y enfermos con patoloxíes clíniques cróniques que puen xenerar esclusión social.
El menú que s’ufrirá demientres la espicha solidaria escomenzará con choscu de Tinéu IXP y quesu Tres Oscos. Nos platos principales, la sidrería Tierra Astur Espiches ufrirá una fabada asturiana con compangu de matana ellaborada con Faba Asturiana IXP, platu al que seguirá una Xata Asturiana IXP guisada al estilu tradicional.
