Entamu LA SIDRA 179 (Payares’18)

Entamu

Avérense les navidaes y ye un bon momentu para recordar como’l seutor sidreru asturianu consiguió diversificar la so ufierta de tala miente que-y permite tar presente con calidá y presonalidá en tolos eventos que son propios d’estes festividaes: la sidre, la sidre calistrao, les esplumoses, de xelu, de fueu, llicores, auguardiente, compuestes, frizante… una variedá impresionante de productos que faciliten que ca añu estes cellebraciones puedan ser más sidreres… y más asturianes.

Per otru llau, prodíguense de forma espontanio los amagüestos, espresión viva de la cultura asturiana de la sidre dende l’orixe de la mesma, y que tornen un merecíu protagonismu a la sidre dulce, cuyu percorríu nel mercáu asturianu ta entá por esplorar; recordándomos de pasu la caótica situación de la produición de mazana nel nuesu país, que yá nun ye que nun llegue a cubrir les nueses necesidaes pal autoconsumu, sinón que sistemáticamente carez la vecería, ensin qu’esista denguna planificación pa menguar les sos llamentables consecuencies.

L’ausencia d’una política agraria propia qu’atienda esti problema dexa n’evidencia la necesidá d’un Plan Estratéxicu pa la Sidre y la Mazana, que namás se ve paliada pol estremu dinamismu del seutor, inda cuando suponga una perda de recursos y una falta de garantía de continuidá. La falta d’un braeru gobiernu asturianu -acullá d’un “Principado” ensin capacidá nin voluntá política- ta saliéndomos caru agora, pero pue selo entá más nun futuru prósimu.

Precisamente por eso agora que tamién s’averen les elleiciones, les asturianes principalmente, va haber que tar especialmente sollertes a los programes elleutorales que se presenten; comprrbar que nellos inclúise’l seutor de la sidre y la mazana, y qu’esisten propuestes concretes pal mesmu: l’imprescindible Plan Estratéxicu frente a les habituales improvisaciones, escurrimientos, y declaraciones mediátiques valeres de conteníos y compromisos.

Nesi sen nun podemos escaecemos de la candidatura de la cultura sidrera asturiana como Padremuñu Inmaterial de la Humanidá. Dempués de tantos años de de falses promeses, tenemos que forciar al “Principado” a cumplir coles sos funciones y cola pallabra dada, pa que presente d’una vegada la nuesa candidatura. Vamos ver.

VER REVISTA