Téunicos del Conseyu Regulaor analicen y certifiquen pumares y llagares pa la nueva produición de la Denominación d’Orixe
LA SIDRA.- Ye tiempu de pañar mazana y prensalo p’algamar el doráu mostiu que llueu tresformaráse na bébora más emblemático d’Asturies. Munchos llagares alcuéntrense yá en plena xera… lo mesmo que’l Conseyu Regulaor de la DOP Sidre d’Asturies. Esti encárgase de protexer la sidre asturiano amparada de la competencia deslleal, imitaciones y cualisquier infración qu’afeute al productu con esti sellu de calidá, amás d’incentivala y promocionala. Tamién, el CR DOP ye’l muérganu de control y certificación que, alcordies col artículu 10 del Reglamentu CEE 2081/92, encárgase de garantizar que los productos protexíos pola Denominación cumplan los requisitos afitaos nel so Reglamentu.
“Del mesmu mou que les pumaraes, tamién los llagares tienen de cumplir unos parámetros de calidá pa iscribise na DOP. Istalaciones, llicencies y l’estáu sanitariu son regularmente controlaes pol equipu téunicu. Nin que dicir de los trasiegos o’l corcháu. Pero amás de too esto, el control documental ye parte imprescindible. Tolos ellaboraores tan suxetos a un esixente control de trazabilidá. Asina pue sabese, por exemplul, qué variedaes y de qué pumareros proceden les mazanes coles que s’ellaboró cauna de les botelles de ‘Sidre d’Asturies’” desplica’l presidente del CR DOP Sidre d’Asturies. La prósima selmana, en el númberu 179 de la revista, espublizaremos un estensu reportaxe sobro los controles que rializa la DOP p’algamar “la meyor sidre” del país.
