Entamu
La ochava edición del Salón Internacional de les Sidres de Gala –SISGA- supunxo un importante avance cuantitativu y cualitativu nel que non solo s’afondó na proyeición internacional, l’espaciu gastronómicu y l’espardimientu y puesta en valor d’esta triba sidre, sinón que sirvió pa poner les bases que dexen conformar una cadarma común que consiga venceyar y potenciar mutuamente a los estremaos territorios sidreros europeos ya internacionales.
El compromisu de la corporación municipal de Xixón col SISGA –na Cena Gala participaron conceyales de la mayoría los grupos políticos- foi siempres modélica, y la so collaboración cola Fundación Asturies XXI nesti campu permite esperar interesantes meyores en beneficiu del conxuntu del seutor sidreru tantu a nivel asturianu como internacional, del qu’esperamos dar noticies llueu.
Llamentablemente, y como escontrapuntu a tan bones noticies, el INE acaba de faer pública una proyeición demográfica p’Asturies nos prósimos 15 años que dando por fechu que se van caltener les polítiques españoles p’Asturies, preve un amenorgamientu de población de práuticamente un 8%, lo qu’amestao a datos oxetivos previos respeutu a l’allarmante emigración forciada de los asturianos menores de 30 años nos postreros años, dibúxamos un panorama francamente desalendaor, darréu que supon unu amenorgamientu del mercáu potencial asturianu pal 2032 de cuasique un 20%.
La consecuencies pal mercáu de la sidre natural, cuyu consumu ciéntrase en más del 96% dientru’l país, son clares, y una vegada más pon n’evidencia la urxencia d’un Plan Estratéxicu pal conxuntu del seutor.
Lo que sí paez que va consiguise, gracies a una presión social continua y constante, ye que’l “Principado” cumpla cola so pallabra tres diez años de promeses valeres, y esta vegada sí presente la candidatura de la cultura asturiana de la sidre a la Unesco; propiamente énte l’Estáu español pa qu’una vegada almitía por ésti y puesta a lo cabero de les munches que fueron acumulándose nestos diez años d’oportunidaes perdíes, la presente y defenda énte esti organismu internacional.
D’otra miente, los llagares empecipien a mayar la poca mazana asturiana d’esta collecha y a importar mazana y mostios pa suplir esta falta. La vecería, solucionada va años en toa Europa, entá sigui causando estragos n’Asturies. Paez mentira.
