El volume d’entrega de distintivos nel añu 2020 de la Denominación d’Orixe Protexía Sidre d’Asturies cifóse en 3.083.000 contraetiquetes, nel 2019 fueron 4.791.000
LA SIDRA.- “La cris sanitario causada pola Covid-19 foi’l factor clave del descensu” argumenta la Denominación d’Orixe Protexía y amiesta que, sobromanera, si tenemos en cuenta qu’el 86% de vientes de la sidre natural tradicional efectúase per mediu de la canal hostelera. Amás nos periodos de reapertura, diz en nota de prensa, los establecimientos tuvieron que convivir con grandes llimitaciones como la prohibición del usu la barra y l’amenorgamientu de meses, aforos y horariu que torgaron consumir con normalidá.
“La sidre natural d’echar ye una bébora social, de compartir, y por ello na coyuntura d’anguañu la so vulnerabilidá ye mayor qu’otra triba consumiciones. Por ello, dende’l Conseyu Regulador trabayóse en campañes de promoción, de sensibilización y n’iniciatives como los vasos de collores, en favor d’un consumu más seguru afechu a les circustancies d’anguañu” siñala.
Sicasí, el Conseyu Regulaor asegura qu’anque la pandemia atayó’l xorrecimientu de vientes añal, esta nun influyó en que ca vegada hebia una mayor aceptación del consumu de productu con Denominación d’Orixe y que la mayoría de llagares coinciden en que les vientes de la sidre DOP con respeutu a la sidre común “medraron enforma”. Coles mesmes y pesia’l descensu en vientes de la sidre natural tradicional n’hostelería, destaca l’aumentu de vientes na canal Alimentación d’un 28% respeutu al añu pasáu, nel mesmu llagar a un 54%, y en pidíos online un 75%. Per otru llau, les sidres naturales esplumoses xorrecieron un 4% según la declaración de vientes de los llagares dende los 84.950 llitros hasta los 88.432 llitros.
