Entamu
La sentencia del Tribunal Supremu revocando sentencies anteriores y estableciendo que la propiedá de la botella sidre ‘molde fierru’ pertenez n’esclusividá a l’Asociación de Sidra Asturiana, ye, ensin llugar a duldes, la noticia sidrera del mes y quiciabis del añu.
Una sentencia que mos dexa un agriduz saborgu, dulce porque reconoz que la botella sidre tradicional ye propia d’Asturies y agriu porque concede a una asociación privada –l’Asociación de Sidra Asturiana, a quien felicitamos dende equí pol so trunfu- la propiedá d’esa botella.
Ello supón que los llagares asturianos que nun pertenezan a la mesma van depender de la bona voluntá que pueda tener esta asociación y, a lo postrero la sentencia tampoco nun garantiza que la botella sidre asturiana vaiga ser utilizada namás por llagares asturianos, darréu que va poder selo por toos aquellos que cunten cola autorización d’ASSA, dixebradamente d’onde seyan o aú ellaboren la sidre.
De fechu atopamosmos con qu’un patrimoniu común de los asturianos, de llibre dimposición p’asturianos o non, pasa a ser propiedá d’una asociación privada.
Pero hai más. El que la sentencia reconoza la identificación ente la botella ‘molde fierru’ y la sidre asturiano entra en choque cola llei que regula la DOP Sidre d’Asturies, darréu que na mesma establezse que la sidre que nun seya de llagares acoyíos a la DOP nun va poder cuntar con denguna triba de símbolu o marca que la rellacione con Asturies… De resultes d’ello cabríe interpretar que namás van poder utilizar la botella tradicional asturiana los llagares d’ASSA –o por ella autorizaos- pa la so sidre DOP.
No fondero d’esti conflictu subyaz, como vien siendo ’marca la casa’ la dexadez y desinterés del ‘Principado’, a quien-y correspondía llitigar por esa botella ‘molde fierru’ como padremuñu asturianu y ponela per ende a dimposición de tolos llagares asturianos- pero que, como ye avezao, dexó pasar esa oportunidá.
D’otra miente, esti mes d’agostu ta siendo especialmente llucíu pa la sidre, y magar la masificación turístico que carez el nuesu país, lo cierto ye que fiestes, certames y festivales sidreros o que tienen a la sidra como protagonista, trunfen de forma espectacular. Y ye qu’afortunadamente’l mundiu la sidre ta bien vivu.
Pa recibir el PDF fai falta tar dáu/da d’alta nel whatsapp de LA SIDRA
