LA SIDRA.- El pasáu xueves 15 de febreru presentóse la XXXI edición del Campionatu Oficial d’Echaores d’Asturies. L’actu, cellebráu na see del Conseyu Regulador de la DOP Sidre d’Asturies (Villaviciosa), foi guiáu pol xerente de la entidá, Daniel Ruiz; el presidente de l’Asociación d’Echaores Saúl Moru; l’alcalde del conceyu de Villaviciosa, Alejandro Vega; el presidente del xuráu del campionatu, Abraham Castellanos; y el director de la oficina de Caxa Rural en Villaviciosa,José Luis Frieyro.
Nesta edición, el campionatu compónse de 19 pruebes, ente les que s’incorpora Gozón. La primer parada de la competición va ser en Tazones. Como novedá, añedir el premiu Meyor Sidrería’. El xuráu, que va tar presidíu por Abraham Castellanos, va tar formáu por cuatro campiones d’Asturies. A diferencia d’ediciones pasaes, les midíes nun van ser tan importantes. Gascona, Llugones, Llanera y Siero conformen los cuatro concursos nos que va variar el vasu del echáu, asina comu’l númberu de los culetes’.
“Esti eventu significa una apuesta pol echáu de sidre, pola sidre con mazana asturiana y polos chigres. A la fin, por temes que mos faen distintos del restu de territorios sidreros y que protexen la cultura sidrera asturiana, esperando que seya reconocida pola UNESCO en payares como Padremuñu Mundial Inmaterial”, espresó’l xerente del Conseyu Regulador de la DOP Sidre d’Asturies, Daniel Ruiz.
