Los Premios SISGA establécense pa premiar les meyores sidres presentaes nel Salón Internacional de les Sidres de Gala, y son agora mesmo un referente internacional de calidá .
Otórguense cuatro tribes de distinciones per categoría: oru, plata y bronce en función de la puntuación llograda, y Premium, a la meyor sidre de ca categoría ente les presentaes al SISGA
L’afitamientu d’esti Salón Internacional y la so repercusión, asina comu la mesma diversificación y dinamismu que vive’l seutor, fai qu’añu tres d’añu vaigan incorporándose al mercáu internacional nueves variedaes de sidre, de tala forma qu’anguañu, los Premios SISGA reconoz catorce categoríes, tando abiertos a nueves incorporaciones.
Les modalidaes establecíes pa los premios SISGA son:
- Meyor Sidre de Copa Seco
- Meyor Sidre de Copa Semi-Seco
- Meyor Sidre de Copa Dulce
- Meyor Sidre Esplumoso Semi-Dulce
- Meyor Sidre Esplumoso Dulce
- Meyor Sidre Brut
- Meyor Sidre Rosao
- Meyor Sidre con otres Frutes
- Sidre Más OriXinal
- Meyor Perea
- Meyor Sidre de Xelu
- Meyor Sidre de Fueu
- Meyor Auguardiente de Sidre
- Meyor Llicor de Sidre
Pa otorgar estos premios confórmase un Xuráu Internacional, de reconocíu prestixu formáu por enólogos, llagareros, periodistes especializaos… presidíu pol espertu Manuel G. Busto y nel que ca llagareru participante pue proponer a un miembru, siguiéndose un sistema de tastia a ciegues y puntuación individualizada acordies a unes normes, criterios y fueya de tastia previamente consensuades ente los miembros del xuráu.
Esti xuráu internacional que decide los Premios SISGA se reunirá en dos xornaes separtaes, la primer d’elles na mañana del vienres 1 d’ochobre, dedicada a la sidre de copa y esplumosa, y la segunda, na mañana del sábadu 2 d’ochobre, a la sidre de pera, llicores, sidre de xelu / fueu y auguardientes de sidre.
Les sidres participantes -les ganaores ente elles- podrán degustase na Tastia Abierta al Públicu, nes Tasties Guiaes, y nel Brunch de Gala, onde procederáse a la entrega de los mencionaos Premios
BRUNCH DE GALA /PREMIOS SISGA’21 / XI SALÓN INTERNACIONAL DE LES SIDRES DE GALA / TASTIA ABIERTA AL PÚBLICU / TASTIES GUIAES / PROGRAMA XI SISGA / LLAGARES PARTICIPANTES
