Semeya: Ceviche de muxones n’escabeche con vinagre de sidre de Agromar, platu del xef José Luis Camacho del Zasacandil
Na presentación de la reforma ufiertóse una tastia maridaxe de les sos conserves, una d’elles son muxones n’escabeche con vinagre de sidre
LA SIDRA.- Agromar invirtió más d’un millón d’euros na ampliación de les sos istalaciones y maquinaria. La reforma escomenzó a finales de 2019 y concluyó nesti 2021. La inversión centróse na ampliación de la nave, na alquisición de nuevos equipos y tamién na puesta en marcha de plaques solares pal usu d’enerxía fotovoltaica. El so xerente, Armando Barrios, señaló na presentación de la obra qu’Agromar ta aguantando la crisis provocada pol andanciu, pesia que bona parte de la so produición ta empobinada a la hostelería. Tamién que les conserveres asturianes apuesten pola calidá pa estremase nel mercáu.
Amás, na presentación llevóse a cabu una tastia de los productos de la conservera en platos creaos pol xef José Luis Camacho, del Zascandil. Ellaboraciones como un cruxente de paté de sardines, una coca con bocartes y pimientos asaos, anchoes con una mantega fecha’l mesmu ingrediente, tortiella de güevares de merluza, una cebolla rellena bonitu y bañada en mueyu de tomate casera, lasaña rellena de caviar d’oricios o un tacu de de cogote de bonitu nel qu’en cuentes de maíz utilizóse una fueya de llechuga. Tamién a destacar un ceviche de muxones. Na ellaboración d’esti postreru utilizó la conserva n’escabeche que se preparar con vinagre de sidre.
“Preparamos l’escabeche con vinagre de sidre, de primeres, pa estremanos d’otros productos asemeyaos. Y hai que dicir que-y apurre un toque bien especial, ye un vinagre más finu, más delicáu, y queda perbién colos muxones” desplicó a esta espublización Armando Barrios. Hai que destacar qu’esta degustación rializóse con un maridaxe con sidre y vinu asturianu. De la nuesa bébora más identitario dióse a probar Poma Áurea, la brut nature de Trabanco. Y en cuantes al vinu, tou foi de la DOP Cangas, la bodega en concretu foi Monasteriu de Corias. Dar a tastiar Guilfa, l’ellaboráu con Albarín blancu, y tamién el tintu, con Verdejo prietu y Carrasquín.
