Del 1 al 10 de setiembre espondránse na Plaza’l Güevu dos amueses fotográfiques allugaes nos tradicionales puestos de la Fiesta de la Sidre
LA SIDRA.- Villaviciosa nun va celebrar esti añu la que sedríe la so XXIII edición de la Fiesta de la Sidre, que taba prevista pal sábadu, 5 de setiembre. La cancelación respuende, como ye de suponer, a les circunstancies derivaes de la cris sociosanitario de la COVID-19.
Nel so llugar, y como homenaxe y agradecimientu a los llagares de Villaviciosa que collaboraron dende los entamos de la citada fiesta, entamóse una esposición de semeyes dedicada al mundiu la sidre y la mazana. Amás, pretende recordase y homenaxar a otros oficios tradicionales y entamadores llocales venceyaos al seutor como son los toneleros.
Dos temátiques
Una va ser la entitulada ‘La Nuesa Sidre’. Esta amuesa ye una innovadora propuesta artística y creadora del fotógrafu asitiáu en Villaviciosa, Xurde Margaride, que va tener como soporte los puestos que tradicionalmente ocupaben los echaores y la sidre de los distintos llagares, na Plaza’l Güevu. Trátase d’un proyectu espositivu de semeya documental empecipiáu fai más de 10 años nel cual amuésense los pasos necesarios na fabricación de la sidre natural asturiana.
La otra ye: ‘Llagareros de Villaviciosa’. Esta ciéntrase y da protagonismu a la figura de los ellaboradores de sidre que participen davezu na cita sidrera. Dicha esposición, que va presidir dende l’escenariu central la Plaza’l Güevu consiste n’una colleición de semeyes en blancu y prietu.
