La novena edición de les xornaes va tener llugar del 29 de febreru al 1 de marzu, y cunta cola collaboración de sidre Buznego
LA SIDRA.- Ta too preparao en Güerres, nel conceyu de Colunga, pa celebrar la novena edición de los yá tradicionales Oricios. Un eventu que, col reclamu d’esti peculiar frutu de la mar, xuncecultura, tradición y música en alrodiu la bona mesa. La Comisión de Festexos de Güerres va disponer pa la ocasión más de 1.500 quilos d’esti demandáu equinodermu, que va poder tastiase crudu o cocíu, amás d’en tortielles y croquetes.
“Tol pueblu de Güerres va enfotase, un añu más, na organización d’un eventu que va arrincar el sábadu cola salida, a les diez de la mañana, de la I Concentración motera Ástur-madrilana del oriciu” siñalen los entamaores. Dos hores dempués, al medíi, va abrise’l recintu, que fasta les cuatru la tardi va ufiertar non solo oricios y platos ellaboraos con esti manxar, sinón toa triba bébores y otres preparaciones pensaes para los visitantes que prefieran tastiar otros platos. Antes, poco dempués de la una la tarde, ta programada una escursión al pedreru entamada pel Cientru d’Interpretación de la Sierra del Sueve.
Amás el cocineru Nacho Manzano va ufiertar una clase maxistral, y el cantante Rodrigo Cuevas va ser gallardonáu col Oriciu d’honor.
